ابن الرجل الميت!

الصحاب الصحاب .. مفيش احلى منهم ..بيبقوا ساعات اكتر من الاخوات .. وانا لى واحد صاحبى اكتر من اخويا كنا مع بعض من زمان فى المدرسة بس الزمان فرق بينا فى الجامعة زى ما الزمان بيفرق بينا وبين كل حاجة احنا بنحبها.

وفى يوم كنا ماشيين انا وصاحبى دا ولقينا شوية عيال بيتخانقوا مع بعض، عملنا زى ما باقى الشعب وقولنا نتفرج بس من غير ما نقطع هدومنا.. وكانوا ولدين بيشتموا بعض واحد جسمه تخين وطويل والتانى قصير و رفيع و الاتنين نازلين شتيمة فى بعض... كنت مستغرب قوى.. ازاى الواد التخين والطويل يقعد يشتم الواد الرفيع القصير.. دا ممكن يضربه ويقطع له لسانه وفجاة قطعت الاستغرابة دى، استغرابة اكتر منها
لاقيت الواد الرفيع القصير بيقول للواد التخين الطويل
" يا بن الرجل الميت... ياض دا انت ابوك ميت ... ياض يا بن الرجل الميت "

حسيت ان عينيا كبرت من كتر ما انا تنحت واستغربت للكلمة قوى،هو بقى فى شتيمة بكده،بس بعدها قولت عادى لما الناس نفسها غريبة هستغرب ليه كلامهم!!

وفى يوم اتوفى والد صاحبى ده اللى اكتر من اخويا و روحنا نصلى صلاة الجنازة افتكرت صاحبى وافتكرت الشتيمه بتاعت " يا ابن الرجل الميت" وصعب عليا ان فى ناس ممكن تشتمه وتقوله يا بن الرجل الميت.

و روحنا بعدها الجبل عشان ندفن والد صاحبى ،كان محطوط فى حاجة لونها ابيض .و كنت اول مرة اشوف حاجة زى كده و فضلت ابص لصاحبى وابص للحاجة اللى لونها ابيض... اقول لنفسى .. " ده ابن ده " و " ده ابو ده "

بس مخى مدنيش وقت انى اقول ولا افكر ..وقولت لالالالا ... دا مش ميت دا اكيد لعبة او دمية او اى حاجة مش معقول يكون ميت ... ولما سمعت من عقلى كلمة ميت .. افتكرت الشتيمة بتاعت " ابن الرجل الميت " وافتكرت ان بقى صاحبى ابن الرجل الميت ...مع اننا كلنا .... اموات ولاد اموات..

عكس الناس...

كانت الدنيا زحمة قوى فى اليوم دا... لا مش فى اليوم دا وبس .. دا هى على طول زحمة .. هو اساسا المترو على طول كدا زحمة... لو الواحد بس يعرف الناس دى كلها جت منين ...وفى المترو فى سلم متحرك فى سلم يطلعك ... وسلم ينزلك

وانا واقف فى السلم اللى بينزل الناس لاقيت راجل عجوز قوى وبيقول للناس:-

_ انا عاوز اطلع وهطلع يعنى هطلع

والناس ترد عليه

_ يا عم الحاج السلم دا عشان الناس تنزل من عليه بس مش عشان تطلع من عليه امشى شوية كدا وهتلاقى السلم اللى هيطلعك

وعم الحاج مش راضى يقتنع بان دى السلم دا هو اللى بينزل مقتنع انه بينزل وبيطلع فى نفس الوقت

طبعا اخر ما الناس زهقت سابوه

وقفت اتفرج على الحاج اللى عاوز يطلع على السلم اللى بينزل

بقى كل ما يطلع شوية السلم ينزله وهو مستغرب !

فضل كذا مرة يطلع ويحاول انه يوصل بس كانت السلم بينزله وهو مستعجب قوى

لحد ما حس انه تعب بقى باصص للارض كانه جاب اخره وحس انه ممكن تكون الناس صح

ساب السلم وراح سال الناس على السلم اللى بيطلع... وراح طلع ومشى لحاله

ساعات الواحد بيكون زى الحاج دا .. فاكر ان اللى فى دماغه بس هو اللى صح وان اللى فى دماغ الناس التانية غلط

مع انه مش بالضرورة يكون فى حد فيهم غلط وبرضوا مش بالضرورة يكون فى حد فيهم صح.. و ممكن يكون فى واحد صح وواحد غلط

بس يا ترى الواحد يعرف هو صح ولا غلط ازاى؟

ما هو ربنا وزع الارزاق كل واحد بص لرزق اللى جنبه

لكن لما سبحانه وزع العقول

كل واحد عجبه عقله !!!